මේවා දැක්කම ලංකාවේ ලමා ලිංගික අපචාර වැඩි නොවී තියෙයිද?

ලංකාවේ ලිංගික අපරාධ ගැන දැන් කතා වෙන තරම බොහොමයි.. ඒ අතරින් කුඩා ගෑණු දරුවන්ට වෙන අපරාධ බොහොමයි.. මේකට විවිධ විවිධ හේතු බලපෑවත් මට ඊයේ සහ අද උදේ හිතුණු දේවල් ටිකක් කියන්න ඕනමයි කියලා හිතුනා.. පහුගිය දවස්වල පියා සහ සහෝදරයා වෙතින් විවිධ අඩන්තේට්ටම් වලට ලක්වෙච්ච දියණියක් ගේ කතාවකුත් හෙලි වුනා.. පියා, සහෝදරයින්, අසල්වාසීන්, ගුරුවරුන් අතින් අතවරයට පත්වන ගැහැනු දරුවන් එමටයි.. අවුරුදු හතේ අටේ කිරි සුවඳවත් නොගිය දරුවන් දූශණය කිරීම් කියන්නේ සාමාන්‍ය දෙයක් වන තරමට වගේ එවැනි සිද්ධීන් අපට අහන්නට ලැබෙනවා...  


එක්තරා නාලිකාවක් විසින් පවත්වන පොඩි එවුන් සඳහා වන නැටුම් තරඟයක් (පොඩි එවුන් තරු කරන ) මම ඊයේ බැලුවා.. අද උදේත් වෙන නාලිකාවක එවැනිම තරඟයක් (පොඩ්ඩන්ට ඕන දෙයක් කරන්න පුළුවන් කියන) බැලුවා.. ඒක බලපුහාම මට හිතුනා ඇයි මේ වග කිය යුතු මාධ්‍ය හරක් වගේ හැසිරෙන්නේ කියලා.. අපි පොඩි කාලේ ලමා නැටුම් බලන්න ආසයි... හුරතල් විදිහට ඇඳගෙන හුරතල් බසින් සින්දු කියමින් නටන නැටුම් බලන් ඉන්න ආසයි... එහෙම කියලා මම කියන්නේ නෑ ලංකාවේ බාල පරම්පරාව හැමදාම ලී කෙලි නැටුනුයි, කළගෙඩි නැටුනුයි නටන්නඕන කියලා.. ඒත් අර නැටුම් වල මිශ්‍ර වෙලා තිබ්බ ලිංගිකත්වය නම් ළමා වයසට කිසිසේත්ම ඔරොත්තු නොදෙන්නක් බවයි මගේ පුද්ගලික හැඟීම.. ඒ විතරක් නොවෙයි.. කැමරා කෝණ පොඩි ගෑණු ළමයින්ගේ බඩවල්වලටයි දෙපා වලටයි ඉලක්ක කරමින් අනුරාගී විදිහට ප්‍රදර්ශ්ණය කිරීමෙන් මට හිතා ගන්න බැහැ මේ රුපවාහිණී නාලිකා මොනවද බලාපොරොත්තු වෙන්නේ කියලා.. මෙහි වරද එහෙමත් නැතිනම් මානසික අසහනය කැමරා කරුවන්ගෙද එහෙම නැත්නම් නලිකා ප්‍රධානීන්ගෙද කියලා අමුතුවෙන් හිතන්න දේකුත් නෑ මම හිතන්නේ...

දෙමවුපියන්ට බනින්නත් බෑ මේවට ළමයි යවනවා කියලා.. තම දරුවාගේ හැකියාවට අත දීමත් එම දරුවා රටේ ජනප්‍රිය තරුවක් කිරීමත් කියන කඩතුරාවෙන් ඔවුන්ගේ දෑස් වැසිලා තියෙන්නේ.. දරුවා පියවරෙන් පියවර ඉදිරියට යද්දි ඇරිලා තියෙන ටිකත් වැහෙන්න පටන් ගන්නවා.. ඉතින් මේකට විසදුම කවදා ලැබෙයිද...?

තමන්ගේ ගෙදර,අල්ලපු ගෙදර ඉන්න ගෑනු දරුවගේ වගේ වයසේ ගෑණු ලමයෙක්ගේ පොඩ්ඩක් ඇරිච්ච බඩ ගෙදර රූපවාහිනියෙන්ම පෙන්නද්දි, අඩ නිරුවත් දෙපා ගෙදර රූපවාහිනියෙන්ම පෙන්නද්දි, පොඩි කෙල්ලක් භාගෙට ඇදන් ශකිලාගේ වක වක සින්දුවට පස්ස කරක කරක නටනවා පෙන්නද්දි හිත දුර්වල ශක්තිමත් පිරිමින්ගේ ගොදුර වෙන්නේ කවුද? 

මේක ගැන කථා කරන්න ගියොත් ලිපි දහයක්වත් ලියන්න වෙයි.. මම පෞද්ගලිකව හිතනවා මේ ළමා රියැලිටි වැඩසටහන් වෙනුවෙන් ප්‍රමිතීන් හා සීමා හදුන්වා දිය යුතුයි කියලා... එහෙම නැත්නම් ජනප්‍රියත්වය හඹා යන පොඩ්ඩෝ ඊට කලින් අළු දූවිලි වෙලා යාවි...